آئینہ کے رکن بنیں ؞؞؞؞؞؞؞ اپنی تخلیقات ہمیں ارسال کریں ؞؞؞؞؞s؞؞s؞؞ ٓآئینہ میں اشتہارات دینے کے لئے رابطہ کریں ؞؞؞؞؞؞؞؞؞ اس بلاگ میں شامل مشمولات کے حوالہ سے شائع کی جاسکتی ہیں۔

Thursday, 26 March 2020

Wabayi Nazla - Coronavirus?


نزلہ و زکام وبائی
مسیح الملک حکیم اجمل خاں ؒ
  انفلوانزا   (Infinenza)
عیاذ باللہ جس طرح کہ طاعون ہیضہ اور دیگر وبائی امراض بعض ایام میں وہاء کے طور پر ظاہر ہو کر دفعتاً صدہا جانوں کو لقمہ اجل بنادیتے ہیں۔ تحقیق جدید سے یہ بات ثابت ہے کہ نزلہ اور زکام کا حملہ بھی بعض دفعہ وبائی طور پر ہوتا ہے۔

اسباب: اس مرض کا باعث ہوا میں ایک سمیت اور زہریلے اثر کا پیدا ہو جانا ہے جو سانسلینے کے ساتھ ہوا کے ہمراہ جسم میں داخل ہو جاتا ہے۔ یہ مرض اکثر جاڑوں میں ہوتا ہے۔ بعض مرطوب نشیبی جگہوں میں یہ مرض اکثر پیدا ہوتا ہے اور ایک مقام سے پیدا ہوکر فوراً ہی بہت سے مقامات میں پھیل جاتا ہے۔ جوان آدی کی بہ نسبت بوڑھے اور بچے اس مرض میں زیادہ مبتلا ہوتے ہیں۔

علامات:  پیشانی اور کمر میں درد ہو کر دفعتا مریض کو بخار چڑھ جاتا ہے۔ بعض مریضوں کو یہ بخار لرزہ سے ہوتا ہے اور بعض کو بغیر لرزے کے۔ آنکھوں اور تمام عضلات جسم میں درد معلوم ہوتا ہے اور دوران سر کی شکایت ہوتی ہے گلا درد کرتا ہے۔ آواز بیٹھ جاتی ہے۔ سینے پر بوجھ اور تناؤ معلوم ہوتا ہے۔ خشک کھانسی ہوتی ہے۔ سانس مشکل سے آتا ہے۔ مریض کی بھوک زائل ہو جاتی ہے۔ ابکائیاں آتی ہیں۔ کبھی قے اور دست آنے لگتے ہیں۔ منہ کا ذا لقہ بگڑ جاتا ہے اگر عوارضات شدید ہوں تو انجام اچھا نہیں ہوتا۔ بعض دفعہ ناک اور حلق کی سوزش آگے ہوا کی نالیوں تک بڑھ کر شدید کھانسی اور نمونیا پیدا کر دیتی ہیں۔ اس مرض کے حملے سے مریض بہت جلد کمزور ہو جاتا ہے۔ عام زکام کی نسبت زکام وبائی میں تکلیف اور کمزوری زیادہ ہوتی ہے اور دفعتا مرض کا حملہ ہونا اور دفعتاً  بہت سے اشخاص  مبتلاۓ مرض ہو جانا اور بخار کا ہونا اس کی خاص تشخیصی علامت ہے۔ اگر عوارضات شدید نہ ہوں اور اس مرض کے ساتھ کوئی دوسرا مرض شامل نہ ہو جائے تو ایک ہفتہ کے اندر اندر مریض کو آرام ہوجاتا ہے۔

علاج : بطور حفظ ماتقدم اس وباء کے زمانہ میں چائے کا استعمال ضرور رکھنا چاہئے۔ غذا میں احتیاط رکھنا بھوک سے کم کھانا قبض نہ ہونے دینا اور کھلی تازہ ہوا میں رہنا لباس صاف رکھنا اس مرض کے حملے سے بچاتا ہے۔ حالتِ مرض میں مریض کو ایک علیحدہ کمرے میں آرام سے لٹائیں۔ شروع میں معدہ اور آنتوں کے صاف کرنے کے لئے قرص ملین 4 عدد نیم گرم پانی کے ہمراہ مریض کو کھلائیں۔ تاکہ دو تین دست آکر معدہ کی صفائی ہو جائے۔ اس کے بعد به دانہ 3 ماشہ عناب 5 دانہ سپستان نو دانہ پانی میں ہلکا جوش دے کر صاف کر کے شربت بنفشہ 2 تولہ ملا کر نیم گرم صبح و شام پلائیں۔ بخار کے لئے خاکسی 5 ماشہ اس نسخہ میں چھڑک کر دیں- رفع درد سر اور جسم کے لئے پاشویہ کریں یعنی گل بنفشہ ایک تولہ اکلیل الملک ایک تولہ گل بابونہ ایک تولہ مرزنجوش ایک تولہ گل خطمی ایک تولہ بیری کے پتے 5 تولہ پانی 10 سیرمیں جوش کر کے اس گرم پانی میں مریض کے پاؤں پنڈلیوں تک 10 منٹ ڈبوئے رکھیں بعده خشک کر کے بستر میں لپیٹ دیں۔ اگر کھانسی کی شدید تکلیف ہو تو بجائے شربت بنفشہ 2 تولہ کے خشخاش 2 تولہ یا شربت اعجاز 2 تولہ اسی نسخہ میں ملا کر دیں- یا خمیرہ خشخاش 7 ماشہ اول کھلا کر اوپر سے یہی نسخہ پلا دیں۔ اگر درد گلو کی شکایت ہو تو بجائے شربت بنفشه 2 تولہ کے شربت توت سیاه 2 تولہ شامل کر کے دیں۔ تقویت کے لئے خمیرہ گاؤ زباں ایک تولہ ورق نقرہ ایک عدد میں لپیٹ کر یا خمیره گاؤزبان جواہر والا 5 ماشہ اسی نسخہ کے ہمراہ کھلا دیں۔ کھانسی کے لئے دوسرے وقت یہ نسخہ دیں لعوق سپستان ایک تولہ لعوق معتدل ایک تولہ پانی یا عرق گاؤزبان 12 تولہ میں جوش دے کر گرم گرم سے ناک اور سر کو بھپارہ دیں۔ اگر کھانسی کے ساتھ سینہ میں درد بھی ہو توقیروطی آرد کرسنہ ایک تولہ میں زعفران ایک ماشہ ایلوا ایک ماشہ باریک پیس کر ملا کر نیمگرم ضماد کریں اور سینے کو روئی کے پہل سے گرم کر کے سینکیں۔ تلئین طبع مطلوب ہو تو شربت بنفشہ کی بجائے شربت ملین چار تولہ پینے کے نسخے میں دیں۔

پرہیز: جن چیزوں سے زکام اور نزلہ میں پرہیز کرنا واجب ہے وہی ملحوظ خاطر رکھیں۔

غذا: لطیف اور سریع الہضم مثلاً شوربہ یخنی آش جو میں شربت بنفشہ ملا کر یا مونگ کی دال چپاتی کے ساتھ دیں۔ پانی کی جگہ عرق مکوہ عرق گاؤزبان نیم گرم پلائیں۔


(شاہد الاسلام کے فیس بک صفحہ سے شکریہ کے ساتھ۔)



0 comments:

Post a comment

خوش خبری