Subah Ki Hawakhori -Mohammad Husain Azad

صبح کی ہوا خوری

محمد حسین آزاد

 صبح کا وقت ہے۔
جی خوش ہے۔
 آؤ! ذرا باغ چلیں ۔ ہوا کھائیں -
آہا ؟ کیا ٹھنڈی ٹھنڈی ہوا چل رہی ہے ! رنگ برنگ کے پھول کھلے ہوئے ہیں -
باغ مہک رہا ہے ۔ آتے ہي دل باغ باغ ہوگیا۔
 ذرا ہریاول کو دیکھنا! آنکھوں میں طراوت آتی ہے!
 ہری ہری گھاس کیا ہے ؟
 سبز مخمل کا فرش بچھ رہا ہے ۔ اس پر اوس کے قطرے پڑے ہیں، گو یا مخمل پر موتی جڑے ہیں ۔
درختوں پر کچھ اور ہی بہار ہے. کسی میں پھل لگا ہے . ڈالیاں جھوم رہی ہیں ۔
کنواں چل رہا ہے .
ایک چھوٹا سا لڑکا بھی پاس کھڑا ہے۔ تماشا دیکھ رہا ہے ۔
 دوسرا بڑا شوقین. ہاتھ میں کتاب ہے۔ سبق یاد کر رہا ہے .
یہ مالی کیا کرتا ہے؟ پودا لگاتا ہے.
چلو! سیر دیکھیں ۔
بڑے میاں! یہ پودا کہاں سے لائے ہو؟
 صاحب زادے ! بادشاہی باغ سے لایا ہوں ۔
کتنے دنوں میں جم جائے گا؟۔ جلدی پهوٹ آئے گا ۔
 گھڑے میں کیا ہے؟
 پانی ہے۔ کیا کرو گے؟
پودے میں دوں گا ۔ اس سے جلدی ہرا بھرا ہو جاۓ گا۔


ہریاول: ہریالی / سبزی / سبزہ / طراوت / تازگی
سبزہ زار / چراگاہ / مرغزار

آئینۂ اطفال میں اور بھی بہت کچھ

مزید پڑھیں

Naqsha Sehr o Iftaar Ramzan ul Mubarak 1441 H April May 2020

آئینہ
نقشہ اوقات سحر و افطار برائے دہلی رمضان المبارک 1441ھ اپریل و مئی 2020ء
رمضان المبارک	سحری	افطار	دن	تاریخ
1	4:21 AM	6:54 PM	سنیچر	25 April
2	4:20 AM	6:55 PM	اتوار	26
3	4:18 AM	6:55 PM	سوموار	27
4	4:17 AM	6:56 PM	منگل	28
5	4:16 AM	6:56 PM	بدھ	29
6	4:15 AM	6:57 PM	جمعرات	30
7	4:14 AM	6:58 PM	جمعہ	1st May
8	4:13 AM	6:58 PM	سنیچر	2
9	4:12 AM	6:59 PM	اتوار	3
10	4:11 AM	6:59 PM	سوموار	4
11	4:10 AM	7:00 PM	منگل	5
12	4:09 AM	7:01 PM	بدھ	6
13	4:08 AM	7:01PM	جمعرات	7
14	4:07 AM	7:02 PM	جمعہ	8
15	4:06 AM	7:02 PM	سنیچر	9
16	4:05 AM	7:03 PM	اتوار	10
17	4:04 AM	7:04 PM	سوموار	11
18	4:03 AM	7:04 PM	منگل	12
19	4:02 AM	7:05 PM	بدھ	13
20	4:01 AM	7:05 PM	جمعرات	14
21	4:01 AM	7:06 PM	جمعہ	15
22	4:00 AM	7:07 PM	سنیچر	16
23	3:59 AM	7:07 PM	اتوار	17
24	3:58AM	7:08 PM	سوموار	18
25	3:58AM	7:08 PM	منگل	19
26	3:57AM	7:09 PM	بدھ	20
27	3:56AM	7:10 PM	جمعرات	21
28	3:55AM	7:10 PM	جمعہ	22
29	3:55AM	7:11 PM	سنیچر	23
30	3:54AM	7:12 PM	اتوار	24

دہلی سے باہر کے حضرات سحر و افطار کے مقامی اوقات پر عمل کریں

مزید پڑھیں

Asrar Jamai Ke Aakhri Ayyam - Masoom Muradabadi

اردو ادب کا ایک بڑا سرمایہ فیس بُک کی تیز رفتاری کے باعث قارئین کی نظروں سے مختصر مدت میں اوجھل ہوجاتا ہے۔ آئینہ نے فیس بُک کے سمندر سے چنندہ تخلیقات کو اپنے قارئین اور آنے والی نسلوں کے لیے محفوظ کرنے کا فیصلہ کیا ہے۔ ان جواہر پاروں کو آئینہ صاحبِ قلم کے شکریہ کے ساتھ اپنے ویب صفحہ پر شامل اشاعت کر رہا ہے۔(آئینہ)

اسرار جامعی کے آ خری ایام

معصوم مرادآبادی

میں نے علامہ اسرار جامعی کے انتقال کی خبر پاتے ہی اپنی تاثرات تحریر کئے تھے اور کئی اخبارات نے اپنے صفحات کی زینت بنایا۔وہ فوری اور جذبات میں لکھی ہوئی ایک تحریر تھی لیکن اب یہ دوسری تحریر میں اسرار جامعی کے آ خری ایام کی ایک تصویر شئیر کرنے کےلئے لکھ رہا ہوں۔ اس تصویر نے مجھے کافی پریشان کیا اور ان کے آ خری دنوں کی بے بسی اور لاچاری پر مجھے رونا بھی آ یا۔ سچ پوچھئے تو یہ زمانہ کی چیرہ دستیوں سے زیادہ خود ان نجی پریشانیوں کی عکاس ہے جس کی تفصیل آ گے آ ئے گی۔

 وہ پچھلے کافی عرصہ سے صاحب فراش تھے اور ان کا بیشتر وقت اسپتال اور گھر کا فاصلہ طے کرنے میں گذرتا تھا۔ یوں تو اسرار جامعی کے انتقال کی افواہ کئی بار اڑی لیکن وہ بڑے سخت جان تھے کہ ہربار خود ہی اس کی تردید کرنے کے لئے نمودار ہوجاتے تھے لیکن اب ایسا نہیں ہوگا کیونکہ یہ خبر درست ہے  ان کا جنازہ دہلی کے اوکھلا علاقے  کی ایک عمارت کی چوتھی منزل پر میں اس چھوٹے سے کمرے میں لاکر رکھا گیا جہاں انھوں نے اپنی زندگی کے آخری ایام بڑی بے بسی اور بے کسی میں گزارے۔ 

اسرار جامعی ہماری سماجی بے حسی کا جیتا جاگتا نمونہ تھے۔سچ پوچھئے تو ہم لوگ ان کی موت کی خبر کا ہی انتظار کر رہے تھے اور لوگوں نے ان سے ملنا جلنا چھوڑ دیا تھا۔جوکوئی بڑی ہمت کرکے ان کی چھوٹی سی کٹیا میں جاتا تو ان کے ساتھ اپنی ایک تصویر فیس بک پر ضرور شئیر کرتا تھا۔ تاکہ ان کی مزاج پرسی کرنے کا ثبوت دے سکے۔ 

82 سال کےاسرار جامعی دہلی کی ادبی محفلوں کی آ برو تھے۔ ایک ایسے وقت میں جب لوگ ان ہی تقریبات میں شرکت کرتے ہیں جہاں انھیں اسٹیج کی زینت بنایا جاتا ہے، ایسی بے شمار تقریبات میں علامہ اسرار جامعی کو میں نے صف سامعین میں ہمہ تن گوش دیکھا۔ ان کی ایک خاص ادا یہ تھی کہ وہ ان تقاریب میں لوگوں کو آ ئینہ دکھانے کے لئے اپنے کچھ قطعات فوٹو اسٹیٹ کرکے لے جاتے تھے اور انھیں تعویذ کی شکل میں تقسیم کرتے تھے۔ اسرار جا معی طنز و مزاح کے شاعر اور صحافی تھے۔ انھوں نے "پوسٹ مارٹم "اور "چٹنی" کے نام سے اپنے مختصر اخبارات شائع کئے اور علم و ادب کی ترسیل میں مصروف رہے۔ " شاعر اعظم" کے عنوان سے ان کے مزاحیہ کلام کا مجموعہ بھی شائع ہوکر مقبول خاص و عام ہوا۔ جسے دہلی اردو اکیڈمی نے شائع کروایا تھا۔ یہ اکیڈمی انھیں دس ہزار روپے ماہانہ امداد دے کر ایک طرح سے ان کی کفالت بھی کررہی تھی۔ مجھے یاد ہے کہ جب میں دہلی اردو اکادمی کی گورننگ کونسل کا ممبر تھا اور پروفیسر اختر الواسع اس کے وائس چیئرمین تھے تو علامہ اسرار جامعی کو طنزومزاح کے ایوارڈ سے نوازا گیا تھا۔ المیہ یہ ہے کہ وہ بہار کی جس مٹی سے اٹھے تھے وہاں کی اردو اکیڈمی نے انھیں کبھی کوئی اعزاز نہیں دیا۔

اسرار جامعی ایک آ سودہ اور خوشحال خانوادے کے فرد تھے اور پٹنہ میں ان کی کروڑوں روپے کی جائیداد تھی لیکن گھریلو جھگڑے اور چھوٹی بھائی کی نفسیاتی الجھنوں نے انھیں دربدری پر مجبور کیا۔ کوئی تیس برس پہلے وہ دہلی چلے آ ئے اور اسی جامعہ کے علاقے میں مقیم ہوئے جہاں انہوں نے تعلیم حاصل کی تھی اور ڈاکٹر ذاکر حسین اور پروفیسر محمد مجیب جیسے لوگوں کے آ گے زانوئے تلمذ طے کیا تھا مگر ان کی بے باکی اور مصلحت ناپسندی نے بہت سے لوگوں سے دور بھی کیا تھا۔ جہاں چاپلوسی اور حاشیہ برداری ضروری ہوتی ہے وہاں وہ اپنی بےلاگ شاعری کا ہنر آ زماتے تھے جس کا ثبوت دہلی پر ان کی طنز یہ نظم بھی ہے۔

علامہ شبلی نعمانی اسرار جامعی نے شادی نہیں کی تھی اور ان کی بہت سی مشکلات اسی کا نتیجہ تھیں۔ انھیں دیکھ کر مجھے مشہور پاکستانی شاعر اور نقاش صادقین کی درج ذیل رباعی یاد آ تی تھی جس میں نے اپنے زمانہ طالب علمی میں غالب اکیڈمی میں خود ان ہی کی زبانی سنی تھی۔

وہ مطلع ہستی پہ ہویدا نہ ہوئی

میں اس پہ فدا وہ مجھ پہ شیدا نہ ہوئی

میں صاحب اولاد بھی ہوسکتا تھا

مگر اولاد کی والدہ ہی پیدا نہ ہوئی 

علامہ اسرار جامعی کو زمانے سے  ڈھیروں شکایات تھیں۔ ظاہری ٹیپ ٹاپ اور بناوٹ کے اس شہر میں کم ہی لوگ انھیں "لفٹ" دیتے تھے۔ وہ ایک سادہ مگر پرکار انسان تھے اور بہترین شاعرانہ صلاحیتوں کے مالک تھے۔ اس کے علاوہ خاندانی شرافت اور وضع داری میں بھی وہ طاق تھے۔ ان کا قریبی تعلق مشہور سیاسی قائد اور سابق سفارتکار زید شہاب الدین مرحوم سے تھا جنہیں وہ اپنا پھوپھا بتاتے تھے۔

ادھر کافی دنوں سے مجھے ان سے نیاز حاصل نہیں ہوا تھا مگر فون پر اکثر باتیں ہوتی تھیں۔ لیکن ادھر کچھ عرصہ سے ان کا فون سوئچ آ ف آ رہا تھا اور میری تشویش بڑھ رہی تھی۔اسی اثناء میں ان کے انتقال کی خبر آ ئی ہے تو قلق اس بات کا ہے کہ میں ان کے جنازے میں بھی شریک نہیں ہوسکا۔  پورے ملک کی طرح دہلی میں بھی لاک ڈاؤن ہے۔ مجھے معلوم ہوا کہ شعبہ اردو جامعہ کے جن اساتذہ اور طلباء نے ان کے جنازے میں شرکت کی انہیں بھی پولیس سے اجازت لینی پڑی۔ ان کی تعداد ایک درجن کے قریب تھی۔ یہی لوگ ان کی خبر گیری بھی کرتے تھے۔ 

علامہ اسرار جامعی نہ جانے کیوں مجھے بہت عزیز رکھتے تھے اور اکثر خود میرے غریب خانے کی زینت بڑھاتے تھے۔

میری ان سے شناسائی کوئی ایک چوتھائی صدی پر محیط ہے۔ انھوں نے میرے اخبار کے لئے یومیہ قطعات بھی لکھے۔ ان کے انتقال سے دہلی کی ادبی تقریبات کی ایک اور نشست خالی ہوگئی ہے۔

(معصوم مرادآبادی کے فیس بُک صفحہ سے شکریہ کے ساتھ)

مزید پڑھیں

Ek Zaroori Itella

ایک ضروری اطلاع

بسم اللہ الرحمٰن الرحیم

#####تمام اعزاء و اقرباء ، مریدین و متعلقین، محبین اور مخلصین خانقاہ مجیبیہ فردوسیہ ، سملہ ، اورنگ آباد (بہار) کو یہ انتہائی اہم اور ضروری اطلاع دی جاتی ہے کہ وبائی و مہلک کرونا وائرس (Covid 19) سے متعلق مرکزی و صوبائی حکومتوں کی جانب سے جاری ہدایات، طبی و احتیاطی تدابیر اور لاک ڈاؤن کے پیش نظر، محبوب الاولیاء حضرت مولانا الحاج شاہ محمد قاسم عثمانی فردوسی سملوی ۔۔۔۔ قدس سرہ ۔۔۔۔ کا پچھترواں(75واں) سالانہ فاتحہ جو 28 شعبان المعظم 1441ھ مطابق 23 اپریل 2020ء بروز جمعرات خانقاہ میں منعقد ہونے والا تھا، اسے ملتوی کیا جارہاہے، آپ تمام حضرات سے یہ درخواست بھی کی جاتی ہے کہ موجودہ حالات میں اکٹھا ہوکر یہ سالانہ فاتحہ کہیں نہ کریں ، اس کے لئے نہ کسی کے گھر جائیں اور نہ کسی کو اپنے گھر بلائیں۔ اور فی الحال مرکزی و صوبائی حکومتوں کی طبی اور احتیاطی تدابیر و ہدایات پر پوری طرح عمل کریں۔۔۔۔اللہ تعالیٰ ہم سب کو اپنے حفظ و امان میں رکھے اور راہ راست پر چلنے کی توفیق عطا فرمائے ۔۔۔آمین۔

منجانب

 شاہ محمد تسنیم عثمانی فردوسی سملوی

سجادہ نشیں 

خانقاہ مجیبیہ فردوسیہ 

سملہ، اورنگ آباد (بہار)

مزید پڑھیں

Reech Ka Bachcha - Nazeer Akbarabadi

ریچھ کا بچّہ نظیر اکبر آبادی

کل راہ میں جاتے جو ملا ریچھ کا  بچّہ  لے آئےو ہیں ہم بھی اٹھا ریچھ کا بچّہ سو نعمتیں کھا کھا کے پلا ریچھ کا  بچّہ جس وقت بڑھا ریچھ ہوا ریچھ کا بچّہ  جب ہم بھی چلے ساتھ چلا ریچھ کا  بچّہ تھا ہاتھ میں اک اپنے سوا من کا جو سوٹا  لوہے کی کڑی جس پر کھٹکتی تھی سراپا کاندھے پر چڑھا جھولنا اور ہاتھ میں پیالا  بازار میں لے آئے دکھانے کو تماشا آگے تو ہم اور پیچھے وہ تھاریچھ کا  بچّہ کہتا تھا کوئی ہم سے میاں آؤ مچھندر وہ کیا ہوئے اگلے جو تمہارے تھے وہ بندر ہم ان سے یہ کہتے تھے یہ پیشہ ہے قلندر ہاں چھوڑ دیا با با انہیں جنگلے کے اندر جس دن سے خدا نے یہ دیاریچھ کا  بچّہ مدّت  میں اب اس بچے کو ہم نے ہےسدھایا  لڑنے کے سوا ناچ بھی اس کو ہے سکھایا یہ کہہ کے جو ڈھپلی کے تئیں گت پہ بجایا اس ڈھب سے اسے چوک کے جمگھٹ میں نچایا جو سب کی نگاہوں میں کھپا ریچھ کا  بچّہ جب ہم نے اٹھا ہاتھ کڑوں کو جو ہلایا  خم ٹھونک پہلواں کی طرح سامنے آیا لپٹا ##تو یہ کُشتی## کا # ہنر##آن دکھایا  جو چھوٹے بڑے جتنے تھے ان سب کو رجھایا ہم بھی نہ تھکے اور نہ تھکا ریچھ کا  بچّہ  جب کُشتی کی ٹھہری تو وہیں سرکو جو جھاڑا  للکارتے ہی اس نے ہمیں آن لتھاڑا گہ ہم نے پچھاڑا اسے گہ اس نے پچھاڑا  اک ڈیڑھ پہر ہوگیا کُشتی کا اکھاڑا گر ہم بھی نہ ہارے نہ ہٹا ریچھ کا بچّہ  کہتا تھا کھڑا کوئی جو کرآه، اہاہا !  اس کے تمہیں استاد ہو واللہ، اہاہا ! یہ سحر کیا تم نے تو ناگاه اہاہا !  کیا کہئے غرض آخرش اے واہ اہاہا !  ایسا تو نہ دیکھا نہ سنا ریچھ کا بچّہ

آئینۂ اطفال میں اور بھی بہت کچھ

مزید پڑھیں

Allama Iqbal Ki Aakhri Raat - Shibli Firdousi

علامہ اقبال کی آخری رات

تلخیص : شبلی فردوسی

20 اپریل 1938ء کی صبح کو ان کی طبیعت کچھ سنبھل گئی تھی۔ انھوں نے معمول کے مطابق دلیے کے ساتھ چائے کی پیالی پی۔ میاں محمد شفیع سے اخبار پڑھوا کر سنا اور رشید حجّام سے شیو بنوائی۔ دوپہر کو ڈاک میں جنوبی افریقہ کے کسی اخبار میں ترشے وصول ہوئے، خبر یہ تھی کہ وہاں کے مسلمانوں نے نمازِ جمعہ کے بعد اقبال، مصطفٰی کمال اور محمد علی جناح کی صحت اور عمر درازی کے لیے دعا کی ہے۔ کوئی ساڑھے چار بجے بیرن فان والتھائم انھیں ملنے کے لیےآگئے۔ بیرن فان والتھائم نے جرمنی میں اقبال کی طالب علمی کے زمانے میں ان کے ساتھ کچھ وقت گزارا تھا اور اب وہ جرمنی کے نازی لیڈر ہٹلرکے نمائندے کی حیثیت سے ہندوستان اور افغانستان کا سفر کر کے شاید ان ممالک کے حالات کا جائزہ لے رہے تھے۔ ہندوستان کا دورہ مکمل کر چکنے کے بعد وہ کابل جا رہے تھے۔ اقبال اور بیرن فان والتھائم دونوں تقریباً ڈیڑھ گھنٹے تک ہائیڈل برگ یا میونخ میں اپنی لینڈ لیڈی، احباب اور اساتذہ کی باتیں کرتے رہے۔ پھر اقبال نے انھیں سفر افغانستان کے متعلق معلومات فراہم کیں۔ جب بیرن فان والتھائم جانے لگے تو اقبال نے بڑی گرم جوشی کے ساتھ مصافحہ کر کے انھیں رخصت کیا۔ شام کی فضا میں موسم بہار کے سبب پھولوں کی مہک تھی اس لیے پلنگ خواب گاہ سے اٹھوا کردالان میں بچھوایا اور گھنٹہ بھر کے لیے وہیں لیٹے رہے پھر جب خنکی بڑھ گئی تو پلنگ گول کمرے میں لانے کا حکم دیا۔ گول کمرے میں ساڑھے سات سالہ منیرہ آپا جان کے ساتھ ان کے پاس گئی۔ منیرہ ان کے بستر میں گھس کر ان سے لپٹ گئی اور ہنسی مذاق کی باتیں کرنے لگی۔ منیرہ عموماً دن میں دو تین بار اقبال کے کمرے میں جاتی تھی۔ صبح اسکول جانے سے پہلے، دوپہر کو اسکول سے واپس آنے پر اور شام کو سونے سے قبل۔ لیکن اس شام وہ ان کے پہلو سے نہ اٹھتی تھی۔ دو تین بار آپا جان سے انگریزی میں کہا، اسے اس کی حس آگاہ کر رہی ہے کہ شاید باپ سے یہ آخری ملاقات ہے۔ منیرہ اور آپاجان کے اندر چلے جانے کے بعد فاطمہ بیگم، پرنسپل اسلامیہ کالج برائے خواتین گھنٹے آدھ گھنٹے کے لیے آ بیٹھیں اوران سے کالج میں درسِ قرآن کے انتظامات کے متعلق باتیں کرتی رہیں۔

رات کو آٹھ ساڑھے آٹھ بجے چوہدری محمد حسین، سید نذیر نیازی، سید سلامت اللہ شاہ، حکیم محمد حسن قرشی اور راجہ حسن اختر آگئے۔ ان ایام میں میاں محمد شفیع اور ڈاکٹر عبد القیوم تو جاوید منزل میں ہی مقیم تھے۔ اقبال کے بلغم میں ابھی تک خون آرہا تھا اور اسی بناء پر چوہدری محمد حسین نے ڈاکٹروں کے ایک بورڈ کی میٹنگ کا انتظام جاوید منزل میں کیا تھا۔ اس زمانے کے معروف ڈاکٹر کرنل امیر چند، الہٰی بخش، محمد یوسف، یار محمد، جمعیت سنگھ وغیرہ سبھی موجود تھے اور انھوں نے مل کر اقبال کا معائنہ کیا۔ گھر میں ہر کوئی ہراساں دکھائی دیتا تھا، کیوں کہ ڈاکٹروں نے کہہ دیا تھا کہ اگر رات خیریت سے گزر گئی تو اگلے روز نیا طریق علاج شروع کیا جائے گا۔ کوٹھی کے صحن میں مختلف جگہوں پر اقبال کے اصحاب دو دو تین تین کی ٹولیوں میں کھڑے باہم سرگوشیاں کر رہے تھے۔ اقبال سے ڈاکٹروں کی رائے مخفی رکھی گئی، لیکن وہ بڑے ذی فہم تھے۔ احباب کا بکھرا ہوا شیرازہ دیکھ کر انھیں یقین ہو گیا تھا کہ ان کی موت کا وقت قریب آپہنچا ہے۔ چند یوم پیشتر جب کسی نے ان کی صحت کے بارے میں تشویش کا اظہار کیا تھا تو فرمایا: میں موت سے نہیں ڈرتا۔ بعد ازاں اپنا یہ شعر پڑھا تھا:؎

نشانِ مرد مومن با تو گویم

چوں مرگ آید تبسم برلب اوست

پس اس رات وہ ضرورت سے زیادہ ہشاش بشاش نظر آرہے تھے۔ راقم کوئی نو بجے کے قریب گول کمرے میں داخل ہوا تو پہچان نہ سکے۔ پوچھا کون ہے؟ راقم نے جواب دیا : جاوید۔ ہنس پڑے، فرمایا: جاوید بن کر دکھاؤ تو جانیں۔ پھر اپنے قریب بیٹھے ہوئے چوہدری محمد حسین سے مخاطب ہو کر فرمایا: چوہدری صاحب! اسے "جاوید نامہ " کے آخر میں وہ دعا "خطاب بہ جاوید" ضرور پڑھوا دیجیے گا۔ اتنے میں علی بخش اندر داخل ہوا۔ اسے اپنے پاس بیٹھنے کے لیے کہا۔ علی بخش نے بلند آواز سے رونا شروع کر دیا۔ چوہدری محمد حسین نے اسے حوصلہ رکھنے کی تلقین کی۔ فرمایا آخر چالیس برس کی رفاقت ہے، اسے رو لینے دیں۔ رات کے گیارہ بجے اقبال کو نیند آگئی۔ البتہ میاں محمد شفیع اور ڈاکٹر عبدالقیوم کے علاوہ راجہ حسن اختر نے اس رات جاوید منزل ہی میں قیام کیا اور باہر دالان میں چارپائی بچھا کر لیٹ گئے۔ راقم بھی حسبِ معمول اپنے کمرے میں جا کر سو رہا۔

اقبال کوئی گھنٹے بھر کے لیے سوئے ہوں گے کہ شانوں میں شدید درد کے باعث بیدار ہو گئے۔ ڈاکٹر عبدالقیوم اور میاں محمد شفیع نے خواب آور دوا دینے کی کوشش کی، مگر انھوں نے انکار کر دیا۔ فرمایا: دوا میں افیون کے اجزاء ہیں اور میں بے ہوشی کے عالم میں مرنا نہیں چاہتا۔ علی بخش اور میاں محمد شفیع ان کے شانے اور کمر دبانے لگے تا کہ درد کی شدت کم ہو، لیکن تین بجے رات تک ان کی حالت غیر ہوگئی۔ میاں محمد شفیع، حکیم محمد حسن قرشی کو بلانے ان کے گھر گئے، مگر ان تک رسائی نہ ہو سکی اور ناکام واپس آگئے۔ اقبال درد سے نڈھال تھے۔ میاں محمد شفیع کو دیکھ کر فرمایا: افسوس قرشی صاحب بھی نہیں پہنچ سکے۔ تقریباً پونے پانچ بجے راجہ حسن اختر اٹھ کر اندر آئے۔ انھیں بھی حکیم محمد حسن قریشی کو بلانے کے لیے کہا۔ وہ بولے: حکیم صاحب رات بہت دیر سے گئے تھے اور اس وقت انھیں بیدار کرنا شاید مناسب نہ ہو۔ اسی پر اقبال نے یہ قطعہ پڑھا:؎

سرود رفتہ باز آید کہ ناید

نسیمے از حجاز آید کہ ناید

سر آمد روزگار ایں فقیرے

وگر دانائے راز آید کہ ناید

راجہ حسن اختر قطعہ کا مطلب سمجھتے ہی حکیم محمد حسن قریشی کو لانے کے لیے روانہ ہوگئے۔ اقبال کے کہنے پر ان کا پلنگ گول کمرے سے ان کی خواب گاہ میں پہنچا دیا گیا۔ انھوں نے فروٹ سالٹ کا گلاس پیا۔ صبح کے پانچ بجنے میں کچھ منٹ باقی تھے۔ اذانیں ہو رہی تھیں سب کا خیال تھا کہ فکر کی رات کٹ گئی۔ ڈاکٹر عبدالقیوم اور میاں محمد شفیع صبح کی نماز ادا کرنے کی خاطر قریب کی مسجد میں پہنچ گئے تھے اور صرف علی بخش ہی اقبال کے پاس رہ گیا تھا۔ اسی اثناء میں اچانک اقبال نے اپنے دونوں ہاتھ دل پر رکھے اور ان کے منہ سے "ہائے" کا لفظ نکلا۔ علی بخش نے فوراً آگے بڑھ کر انھیں شانوں سے اپنے بازؤوں میں تھام لیا۔ فرمایا: دل میں شدید درد ہے اور قبل اس کے کہ علی بخش کچھ کر سکے، انھوں نے "اللہ" کہا اور ان کا سر ایک طرف ڈھلک گیا۔ 21 اپریل 1938ء کو پانچ بج کر چودہ منٹ صبح کی اذانوں کی گونج میں اقبال نے اپنے دیرینہ ملازم کی گود میں اپنی جان جانِ آفریں کے سپرد کردی۔ طلوعِ آفتاب کے بعد جب راقم اور منیرہ نے ان کے دروازے کی دہلیز پر کھڑے ہو کر ڈرتے ڈرتے اندر جھانکا تو خواب گاہ میں کوئی بھی نہ تھا۔ کھڑکیاں کھلی تھیں اور وہ پلنگ پر سیدھے لیٹے تھے۔ انھیں گردن تک سفید چادر نے ڈھانپ رکھا تھا، جو کبھی کبھار ہوا کے جھونکوں سے ہل جاتی تھی۔ ان کی آنکھیں بند تھیں، چہرہ قبلہ کی طرف تھا، مونچھوں کے بال سفید ہو چکے تھے اور سر کے بالوں کے کناروں پر راقم کے کہنے سے آخری بار لگائے ہوئے خضاب کی ہلکی سی سیاہی موجود تھی۔
----------------------------------------------------------------------

معاون کتب : (زندہ رُود، ڈاکٹر جاوید اقبال، ص 718 تا 720)

زندہ رُود (علامہ اقبال کی مکمل سوانح حیات) | باتصویر ایڈیشن

فرزندِ اقبال جسٹس (ر) ڈاکٹر جاوید اقبال مرحوم کے قلم سے

مزید پڑھیں

O Des Se Aane Wale Bata - Akhtar Sheerani

او دیس سے آنے والے بتا

اختر شیرانی

او دیس سے آنے والے بتا  او دیس سے آنے والے بتا  کس حال میں ہیں یاران وطن  آوارۂ غربت کو بھی سنا  کس رنگ میں ہے کنعان وطن  وہ باغ وطن فردوس وطن  وہ سرو وطن ریحان وطن  او دیس سے آنے والے بتا او دیس سے آنے والے بتا  کیا اب بھی وہاں کے باغوں میں  مستانہ ہوائیں آتی ہیں  کیا اب بھی وہاں کے پربت پر  گھنگھور گھٹائیں چھاتی ہیں  کیا اب بھی وہاں کی برکھائیں  ویسے ہی دلوں کو بھاتی ہیں  او دیس سے آنے والے بتا او دیس سے آنے والے بتا  کیا اب بھی وطن میں ویسے ہی  سرمست نظارے ہوتے ہیں  کیا اب بھی سہانی راتوں کو  وہ چاند ستارے ہوتے ہیں  ہم کھیل جو کھیلا کرتے تھے  کیا اب وہی سارے ہوتے ہیں  او دیس سے آنے والے بتا او دیس سے آنے والے بتا  کیا اب بھی شفق کے سایوں میں  دن رات کے دامن ملتے ہیں  کیا اب بھی چمن میں ویسے ہی  خوش رنگ شگوفے کھلتے ہیں  برساتی ہوا کی لہروں سے بھیگے ہوئے پودے ہلتے ہیں  او دیس سے آنے والے بتا او دیس سے آنے والے بتا  شاداب و شگفتہ پھولوں سے  معمور ہیں گل زار اب کہ نہیں  بازار میں مالن لاتی ہے  پھولوں کے گندھے ہار اب کہ نہیں  اور شوق سے ٹوٹے پڑتے ہیں  نوعمر خریدار اب کہ نہیں  او دیس سے آنے والے بتا او دیس سے آنے والے بتا  کیا شام پڑے گلیوں میں وہی  دلچسپ اندھیرا ہوتا ہے  اور سڑکوں کی دھندلی شمعوں پر  سایوں کا بسیرا ہوتا ہے  باغوں کی گھنیری شاخوں میں  جس طرح سویرا ہوتا ہے  او دیس سے آنے والے بتا او دیس سے آنے والے بتا  کیا اب بھی وہاں ویسی ہی جواں  اور مدھ بھری راتیں ہوتی ہیں  کیا رات بھر اب بھی گیتوں کی  اور پیار کی باتیں ہوتی ہیں  وہ حسن کے جادو چلتے ہیں  وہ عشق کی گھاتیں ہوتی ہیں  او دیس سے آنے والے بتا او دیس سے آنے والے بتا  میرانیوں کے آغوش میں ہے  آباد وہ بازار اب کہ نہیں  تلواریں بغل میں دابے ہوئے  پھرتے ہیں طرحدار اب کہ نہیں  اور بہلیوں میں سے جھانکتے ہیں  ترکان سیہ کار اب کہ نہیں  او دیس سے آنے والے بتا او دیس سے آنے والے بتا  کیا اب بھی مہکتے مندر سے  ناقوس کی آواز آتی ہے  کیا اب بھی مقدس مسجد پر  مستانہ اذاں تھراتی ہے  اور شام کے رنگیں سایوں پر  عظمت کی جھلک چھا جاتی ہے  او دیس سے آنے والے بتا او دیس سے آنے والا بتا  کیا اب بھی وہاں کے پنگھٹ پر  پنہاریاں پانی بھرتی ہیں  انگڑائی کا نقشہ بن بن کر  سب ماتھے پہ گاگر دھرتی ہیں  اور اپنے گھروں کو جاتے ہوئے  ہنستی ہوئی چہلیں کرتی ہیں  او دیس سے آنے والے بتا او دیس سے آنے والے بتا  برسات کے موسم اب بھی وہاں  ویسے ہی سہانے ہوتے ہیں  کیا اب بھی وہاں کے باغوں میں  جھولے اور گانے ہوتے ہیں  اور دور کہیں کچھ دیکھتے ہی  نوعمر دیوانے ہوتے ہیں  او دیس سے آنے والے بتا او دیس سے آنے والے بتا  کیا اب بھی پہاڑی چوٹیوں پر  برسات کے بادل چھاتے ہیں  کیا اب بھی ہوائے ساحل کے  وہ رس بھرے جھونکے آتے ہیں  اور سب سے اونچی ٹیکری پر  لوگ اب بھی ترانے گاتے ہیں  او دیس سے آنے والے بتا  او دیس سے آنے والے بتا  کیا اب بھی پہاڑی گھاٹیوں میں  گھنگھور گھٹائیں گونجتی ہیں  ساحل کے گھنیرے پیڑوں میں  برکھا کی ہوائیں گونجتی ہیں  جھینگر کے ترانے جاگتے ہیں  موروں کی صدائیں گونجتی ہیں  او دیس سے آنے والے بتا او دیس سے آنے والے بتا  کیا اب بھی وہاں میلوں میں وہی  برسات کا جوبن ہوتا ہے  پھیلے ہوئے بڑ کی شاخوں میں  جھولوں کا نشیمن ہوتا ہے  امڈے ہوئے بادل ہوتے ہیں  چھایا ہوا ساون ہوتا ہے  او دیس سے آنے والے بتا او دیس سے آنے والے بتا  کیا شہر کے گرد اب بھی ہے رواں  دریائے حسیں لہرائے ہوئے  جوں گود میں اپنے من کو لیے  ناگن ہو کوئی تھرائے ہوئے  یا نور کی ہنسلی حور کی گردن  میں ہو عیاں بل کھائے ہوئے  او دیس سے آنے والے بتا او دیس سے آنے والے بتا  کیا اب بھی فضا کے دامن میں  برکھا کے سمے لہراتے ہیں  کیا اب بھی کنار دریا پر  طوفان کے جھونکے آتے ہیں  کیا اب بھی اندھیری راتوں میں  ملاح ترانے گاتے ہیں  او دیس سے آنے والے بتا او دیس سے آنے والے بتا  کیا اب بھی وہاں برسات کے دن  باغوں میں بہاریں آتی ہیں  معصوم و حسیں دوشیزائیں  برکھا کے ترانے گاتی ہیں  اور تیتریوں کی طرح سے رنگیں  جھولوں پر لہراتی ہیں  او دیس سے آنے والے بتا او دیس سے آنے والے بتا  کیا اب بھی افق کے سینے پر  شاداب گھٹائیں جھومتی ہیں  دریا کے کنارے باغوں میں  مستانہ ہوائیں جھومتی ہیں  اور ان کے نشیلے جھونکوں سے  خاموش فضائیں جھومتی ہیں  او دیس سے آنے والے بتا او دیس سے آنے والے بتا  کیا شام کو اب بھی جاتے ہیں  احباب کنار دریا پر  وہ پیڑ گھنیرے اب بھی ہیں  شاداب کنار دریا پر  اور پیار سے آ کر جھانکتا ہے  مہتاب کنار دریا پر  او دیس سے آنے والے بتا او دیس سے آنے والے بتا  کیا آم کے اونچے پیڑوں پر  اب بھی وہ پپیہے بولتے ہیں  شاخوں کے حریری پردوں میں  نغموں کے خزانے گھولتے ہیں  ساون کے رسیلے گیتوں سے  تالاب میں امرس گھولتے ہیں  او دیس سے آنے والے بتا  او دیس سے آنے والے بتا  کیا پہلی سی ہے معصوم ابھی  وہ مدرسے کی شاداب فضا  کچھ بھولے ہوئے دن گزرے ہیں  جس میں وہ مثال خواب فضا  وہ کھیل وہ ہم سن وہ میداں  وہ خواب گہہ مہتاب فضا  او دیس سے آنے والے بتا او دیس سے آنے والے بتا  کیا اب بھی کسی کے سینے میں  باقی ہے ہماری چاہ بتا  کیا یاد ہمیں بھی کرتا ہے  اب یاروں میں کوئی آہ بتا  او دیس سے آنے والے بتا  للہ بتا للہ بتا  او دیس سے آنے والے بتا او دیس سے آنے والے بتا  کیا ہم کو وطن کے باغوں کی  مستانہ فضائیں بھول گئیں  برکھا کی بہاریں بھول گئیں  ساون کی گھٹائیں بھول گئیں  دریا کے کنارے بھول گئے  جنگل کی ہوائیں بھول گئیں  او دیس سے آنے والے بتا او دیس سے آنے والے بتا  کیا گاؤں میں اب بھی ویسی ہی  مستی بھری راتیں آتی ہیں  دیہات کی کمسن ماہ وشیں  تالاب کی جانب جاتی ہیں  اور چاند کی سادہ روشنی میں  رنگین ترانے گاتی ہیں  او دیس سے آنے والے بتا او دیس سے آنے والے بتا  کیا اب بھی گجردم چرواہے  ریوڑ کو چرانے جاتے ہیں  اور شام کے دھندلے سایوں کے  ہم راہ گھروں کو آتے ہیں  اور اپنی رسیلی بانسریوں  میں عشق کے نغمے گاتے ہیں  او دیس سے آنے والے بتا او دیس سے آنے والے بتا  کیا گاؤں پہ اب بھی ساون میں  برکھا کی بہاریں چھاتی ہیں  معصوم گھروں سے بھور بھئے  چکی کی صدائیں آتی ہیں  اور یاد میں اپنے میکے کی  بچھڑی ہوئی سکھیاں گاتی ہیں  او دیس سے آنے والے بتا او دیس سے آنے والے بتا  دریا کا وہ خواب آلودہ سا گھاٹ  اور اس کی فضائیں کیسی ہیں  وہ گاؤں وہ منظر وہ تالاب  اور اس کی ہوائیں کیسی ہیں  وہ کھیت وہ جنگل وہ چڑیاں  اور ان کی صدائیں کیسی ہیں  او دیس سے آنے والے بتا  او دیس سے آنے والے بتا  کیا اب بھی پرانے کھنڈروں پر  تاریخ کی عبرت طاری ہے  ان پورنا کے اجڑے مندر پر  مایوسی و حسرت طاری ہے  سنسان گھروں پر چھاؤنی کے  ویرانی و رقت طاری ہے  او دیس سے آنے والے بتا  او دیس سے آنے والے بتا  آخر میں یہ حسرت ہے کہ بتا  وہ غارت ایماں کیسی ہے  بچپن میں جو آفت ڈھاتی تھی  وہ آفت دوراں کیسی ہے  ہم دونوں تھے جس کے پروانے  وہ شمع شبستاں کیسی ہے  او دیس سے آنے والے بتا  او دیس سے آنے والے بتا  مرجانا تھا جس کا نام بتا  وہ غنچہ دہن کس حال میں ہے  جس پر تھے فدا طفلان وطن  وہ جان وطن کس حال میں ہے  وہ سرو چمن وہ رشک سمن  وہ سیم بدن کس حال میں ہے  او دیس سے آنے والے بتا  او دیس سے آنے والے بتا  کیا اب بھی رخ گلرنگ پہ وہ  جنت کے نظارے روشن ہیں  کیا اب بھی رسیلی آنکھوں میں  ساون کے ستارے روشن ہیں  او دیس سے آنے والے بتا  او دیس سے آنے والے بتا  کیا اب بھی شہابی عارض پر  گیسوئے سیہ بل کھاتے ہیں  یا بحر شفق کی موجوں پر  دو ناگ پڑے لہراتے ہیں  اور جن کی جھلک سے ساون کی  راتوں کے سپنے آتے ہیں  او دیس سے آنے والے بتا  او دیس سے آنے والے بتا  اب نام خدا ہوگی وہ جواں  میکے میں ہے یا سسرال گئی  دوشیزہ ہے یا آفت میں اسے  کمبخت جوانی ڈال گئی  گھر پر ہی رہی یا گھر سے گئی  خوش حال رہی خوش حال گئی  او دیس سے آنے والے بتا

مزید پڑھیں

Istaqbal e Ramzan - Shah Hasan Usmani

استقبال ماہِ رمضان دراصل پروفیسر شاہ حسن عثمانیؒ کا وہ خطبہ ہے جو انہوں نےمسجد ادارہ مدینة العلوم ، ذاکر نگر، جمشید پور میں دیا تھا۔ جو ایک کتابچہ کی شکل میں شائع ہوا ہے۔ آئینہ اس خطبہ کو افادۂ عام کے لیے پیش کر رہا ہے۔ اس سال مہلک کرونا وائرس کی تباہ کاریوں کی وجہ سے علما نے رمضان المبارک کی عبادات و مشغولیات کے لیے کچھ ہدایات جاری کی ہیں ان کے پیش نظر اس خطبہ کی اہمیت اور بڑھ جاتی ہے۔(آئینہ)

استقبال ماہِ رمضان

پروفیسر شاہ حسن عثمانی

بعد خطبہ مسنونہ

محترم بزرگو، دوستو اور عزیز نوجوانو

اللہ کا بڑا فضل اور اس کا احسان ہے کہ اس سال بھی ہمیں اور آپ کو رمضان المبارک کا یہ مہینہ نصیب ہوا ہے ۔ اورہمیں اس کا موقع ملا ہے کہ ہم اس مہینہ سے زیادہ سے زیادہ برکات حاصل کر سکیں۔ اگر آپ غور کریں اور اپنے گردو پیش  پرنظر ڈالیں تو آپ کو کتنے ایسے لوگ ملیں گے جو گذشتہ رمضان المبارک میں موجود تھے اور وہ آج ہم میں نہیں ہیں ۔ یہ ہماری اور آپ کی خوش قسمتی ہے کہ الله تعالی ٰنے ہمیں اور آپ کو زندہ رکھا اور اس مبارک مہینہ میں جس کا مقصد ہی تقویٰ حاصل کرنا ہے۔ اس کا موقع نصیب کیا ہے کہ ہم زیادہ سے زیادہ تقویٰ کی زندگی بسر کرسکیں۔

حضرات !

جب رمضان المبارک کا مہینہ آتا تھا تو رسول کریم صلی اللہ علیہ وسلم لوگوں کو اس کی طرف متوجہ کرتے تھے اور آپ خود کمرکس کر عبادت و ریاضت کے لئے تیار ہوتے تھے۔ ہم رسول کریم صلی الله علیہ وسلم کے اسی  اسوہ کے مطابق چند باتیں آپ کے سامنے رکھنا چاہتے ہیں جو دراصل رمضان المبارک کی تیاری کے سلسلے کی چند تجاویز اور تدابیر ہیں ۔ جنہیں اگر ہم استعمال میں لائیں تو ہم رمضان المبارک سے زیادہ سے زیادہ فائدہ اٹھا سکتے ہیں ۔ اس سلسلہ میں ہم نے جو کچھ پڑھا لکھا ہے اور جو ہماری سوچ ہے ان باتوں کو بہت ہی اختصار کے ساتھ آپ کے سامنے رکھ رہے ہیں ۔ دعا ہے کہ اللہ تعالی ٰمیری بات کو آپ کے دلوں میں اتار دے۔ اور اس سے آپ کی زندگی میں جو اچھے اثرات مرتب ہوں وہ آپ کے لئے بھی دین و دنیا میں فلاح کا سبب اور میرے لئے بھی مغفرت کی موجب ہوں ۔ اس لئے میری درخواست ہے کہ اگر آپ ان باتوں کو اپنے لئے نافع پائیں تو دعا کریں کہ اللہ تعالی ٰمیرا خاتمہ ایمان پر کرے اور مجھے اپنی مغفرت میں ڈھانپ لے۔

بہ شکریہ رومی عثمانی

حضرات ! ایک دفعہ پھر رمضان المبارک کا مہینہ ہمارےاوپر سایہ فگن ہے اور اس کی رحمتوں کی بارش ہماری زندگیوں کو سیراب کرنے کے لئے برس رہی ہے۔ اس ماہ کی عظمت و برکت کا کیا ٹھکانا جسے  نبی کریم صلی اللہ علیہ وسلم نے خود ہی بڑی عظمت والا اور بڑی برکت والا مہینہ بتایا ہے۔ اس ماہ کی ہر گھڑی میں فیض و برکت کا اتنا خزانہ پوشیدہ ہے کہ نفل اعمال صالحہ فرض اعمال صالحہ کے درجہ کو  پہنچ جاتے ہیں اور فرائض ستر (۷۰) گونہ زیادہ وزنی اور بلند ہو جاتے ہیں ۔ رمضان آتا ہے تو آسمان کے دروازے کھول دیئے جاتے ہیں اور رحمتوں کی بارش ہوتی ہے۔ اور جنت کے دروازے کھول دیئے جاتے ہیں اور نیکی کے راستوں پر چلنے کی سہولت اور توفیق نصیب ہوتی ہے۔ جہنم کے دروازے بند کر دیئے جاتے ہیں اور روزہ بدی کے راستوں کی رکاوٹ بن جاتا ہے۔ پس بشارت دی ہے نبی کریم صلی اللہ علیہ وسلم نے اس شخص کو جورمضان المبارک میں روزے رکھے کہ اس کے سارے اگلے پچھلے گناہ بخش دیئے جائیں گے۔ اور اس شخص کو جو راتوں میں نماز کے لئے کھڑا ہے اس کے بھی گناہ بخش دیئے جائیں گے ۔ اور وہ جو شب قدر میں قیام کر کے اس کے بھی۔ بس شرط یہ ہے کہ وہ اپنے رب کی باتوں اور وعدوں کو سچ جانے اور عمل صالح کرتا رہے۔

حضرات !

اس مہینہ کی عظمت اور برکت بلا شبہ عظیم ہے۔ لیکن ایسا بھی نہیں ہے کہ اس کی رحمتیں اور برکتیں ہر اس شخص کے حصہ میں آ گئیں جو اس مہینہ کو پالے۔ جب بارش ہوتی ہے تو مختلف ندی، نالے اور تالاب اپنی اپنی وسعت اور گہرائی کے مطابق ہی اس کے پانی سے فیض یاب ہوتے ہیں ۔ زمین کے مختلف ٹکڑے بھی اپنی استعداد کے مطابق ہی فصل دیتے ہیں۔ بارش سب پر یکساں برستی ہے مگر ایک چھوٹے سے گڑھے کے حصے میں اتنا وافر پانی نہیں آتا جتنا ایک لمبے چوڑے تالاب میں بھر جاتا ہے۔ اسی طرح جب پانی کسی چٹان یا بنجر زمین پر گرتا ہے تو اس کے اوپر ہی سے بہہ جا تا ہے اور اس کو کوئی نفع نہیں پہنچاتا لیکن اگر زمین زرخیز ہو تو وہ  لہلہا اٹھتی ہے۔ یہی حال انسانوں کی فطرت اور اس کے نصیب کا ہے۔ اس لئے نبی کریم صلی اللہ علیہ وسلم کی اس تنبیہ کو اچھی طرح یادرکھئے ۔ کتنے روزے دار ہیں جن کو اپنے روزوں سے بھوک پیاس کے سوا کچھ نہیں ملتا۔ اور کتنے راتوں کو نماز پڑھنے والے ہیں جن کو اپنی نمازوں سے رات کی جگائی کے سوا کچھ حاصل نہیں ہوتا۔

حضرات!

ہمیں اب غور کرنا ہے کہ کون کون سی تدابیر اختیار کریں جس سےہمیں زیادہ سے زیادہ فائدہ حاصل ہو سکے۔ اور ہمارے اندرصحیح معنوں تقویٰ کی صفت پیدا ہو جائے ۔ جو اصل مطلوب ہے۔

اس سلسہ میں پہلی چیز  نیت اور پکا ارادہ ہے۔ نیت صحیح بھی ہونی چاہئے اور خالص بھی ۔ لیکن ہر کام صرف اللہ تعالی ٰکی رضا کے حصول کے لئے اور اس کے اجر و انعام حاصل کرنے کے لئے کرنا چا ہئے۔ اگر آپ کی نیت خالص نہ ہوگی اور آپ کا  م صرف الله تعالی کی رضا کے لئے نہ کریں گے تو وہ قبول نہ ہو گا ۔ اور آپ کی محنت کا اجر ضائع کیا جا سکتا ہے۔ اللہ محفوظ رکھے۔

اس مقصد کے لئے بہت مفید ہوگا۔ اگر آپ رمضان المبارک کے آغاز سے ایک دن پہلے یا آغاز کے فورا ًبعد پہلی ہی رات میں تھوڑی دیر تنہائی میں بیٹھ جائیں ۔ اللہ تعالیٰ کے حضور خود کو حاضر جا نیں۔ اس کی حمد کریں۔ اس کے نبی پر در و دبھیجیں۔ اپنے گناہوں سے استغفار کریں ۔ اس کے بعد پورے ماہ کوشش اور محنت کی نیت اور ارادہ کریں: اللہ تعالی ٰسے توفیق اور اعانت طلب کریں اور دعا کریں کہ وہ آپ کا ہاتھ پکڑ کے آپ کو اپنی راہ پر چلائے۔

دوسری چیز قرآن مجید کی تلاوت و سماعت اورعلم وفہم کے حصول کا اہتمام ہے۔ اس مہینہ کا اصل حاصل ہی قرآن سننا اور پڑھنا۔ قرآن سیکھنا اور اس پرعمل کی استعداد پیدا کرنا ہے۔ اس لئے آپ کو سب سے زیادہ اہتمام جس چیز کا کرنا چاہئے وہ یہ ہے کہ آپ زیادہ سے زیادہ وقت قرآن مجید کی صحبت و معیت میں بسر کریں۔ یہ وقت اس طرح بسر کریں کہ ایک طرف آپ کو معلوم ہو کہ اللہ تعالی ٰنے آپ سے کیا کہا ہے۔ دوسری طرف آپ کا دل اور آپ کی سوچ قرآن کو جذب کرلے۔ اور آپ کے اندر اس کے مطابق عمل کے لئے آمدگی پیدا ہو۔ نماز تراویح کی پابندی سے کم از کم اتنا ضرور حاصل ہوتا ہے کہ آپ پورا قرآن ایک بار سن لیتے ہیں ۔ اللہ کے حضور کھڑے ہو کر اللہ کے کلام سننے کا روحانی فائدہ اپنی جگہ بہت قیمتی ہے ۔ لیکن عربی نہ جاننے کی وجہ سے آپ اس عبادت سے یہ فائدہ نہیں حاصل کر پاتے کہ آپ قرآن کے پیغام اور مضامین سے واقف ہو جائیں۔ ان کو تازہ کر لیں ۔ اس لئے ضروری ہے کہ آپ اس مقصد کے لئے کچھ زیادہ محنت کریں اور کچھ اس سے زیادہ وقت قرآن کے لئے لگا ئیں جتنا وقت آپ تر اویح میں لگاتے ہیں ۔ یعنی روزانہ قرآن کا کچھ حصہ تر جمہ سے سمجھ کر پڑھنے کی کوشش کریں ۔ سمجھ کر پڑھنے کے ساتھ یہ بھی ضروری ہے کہ آپ قرآن مجید کو اپنے اندر جذب کریں اور اس کے ساتھ اپنے دل اور روح کے تعلق کو گہرا کریں اور پروان چڑھائیں ۔ قرآن مجید نے خود اپنے پڑھنے اور سننے والوں کی جو صفات بیان کی ہیں وہ صرف ذہن سے سمجھ کر پڑھنے تک محدود نہیں ہے۔ قرآن کا اپنا بیان ہے کہ جب ان کی آیات تلاوت کی جاتی ہیں تو سننے اور پڑھنے والوں کے دل کانپ اٹھتے ہیں اور نرم پڑ جاتے ہیں ۔ ان کے جسم کے رونگٹے کھڑے ہوجاتے ہیں۔ ان کی آنکھوں سے آنسو بہنے لگتے ہیں۔ ان پر گریہ و زاری طاری ہو جاتا ہے۔ ان کا ایمان بڑھتا ہے۔ نبی کریم صلی اللہ علیہ وسلم نے بھی فرمایا کہ جب قرآن مجید پڑھوتو روو ٔ اور اگر رونا نہ آئے تو رونے کی کوشش کرو ۔ اس لئے کہ قرآن حزن کے ساتھ نازل کیا گیا ہے۔

تیسری چیز ، اللہ تعالیٰ کی نافرمانی سے بچنے کی خصوصی کوشش ہے۔ روزہ کا مقصد تقوی ٰپیدا کرنا ہے، اور رمضان المبارک کا مہینہ تقویٔ کی افزائش کے لئے بہترین موقع فراہم کرتا ہے۔ اس لئے اس مہینہ میں اللہ تعالی ٰکی نافرمانی سے بچنے کی خصوصی کوشش کرنا ضروری ہے۔ یوں تو یہ کوشش زندگی کے ہر معاملہ میں کرنا چاہئے ۔ لیکن دوسرے انسانوں کے ساتھ تعلقات اور معاشرتی روابط کے معاملہ میں خاص توجہ کی ضرورت ہے۔ وہ آدمی بڑاہی بد قسمت ہوگا جو بڑے اہتمام سے روزے رکھے ۔ نمازیں پڑھے۔ صدقے کرے ، قرآن پڑھے اور پھر قیامت کے دن اللہ کے حضور اس حال میں آئے کی گردن پر لوگوں کی طرف سے دعوؤں کا ایک انبار ہو۔ کسی کو مارا۔ کسی کو گالی دی ۔ کسی کی بے عزتی کی۔ کسی کا دل دکھایا۔ کسی کا مال ناحق کھایا۔ نبی کریم صلی اللہ علیہ وسلم نے فرمایا میری امت میں اصل مفلس ایسا ہی شخص ہے۔ اس کی تمام نیکیاں دعوے داروں کو دیدی جائیں گی ۔ پھر بھی ختم نہ ہوئے تو دعویٰ داروں کے گناہ اس کے سر ڈال دئے جا ئیں گے ۔ اور اس کو سر کے بل جہنم میں پھینک دیا جائے گا۔ اللہ تعالی ٰ ہم سبھوں کو اس سے محفوظ  رکھے۔ اچھی طرح جان لیجئے کہ روز ہ صرف پیٹ کا روزہ نہیں ہے۔ آنکھ کا بھی روزہ ہے۔ کان کا بھی روزہ ہے۔ زبان کا بھی روزہ ہے۔ ہاتھ کا بھی روزہ ہے۔ پاؤں کا بھی روزہ ہے۔ وہ روز ہ یہ ہے کہ آنکھ وہ نہ دیکھے، کان وہ نہ سنے، زبان وہ نہ بولے۔ ہاتھ پاؤں وہ کام نہ کریں جو اللہ تعالی کو نا پسند ہیں ۔ اور جن سے اس نے منع فرمایا ہے۔

چوتھی چیز قیام لیل ہے۔ رات کا قیام اور تلاوت قرآن۔ اپنا احتساب اور استغفار۔ تقویٰ کے حصول کے لئے بہت ضروری اور کارگر نسخہ ہے۔ یہ متقیوں کی صفت اور علامت ہے۔ اللہ تعالیٰ نے فرمایا ہے کہ متقی وہ ہیں جو راتوں کو کم سوتے ہیں اور سحر کے وقت استغفار کرتے ہیں۔ رمضان کے مہینہ میں تھوڑا سا اہتمام کر کے رات کے اس آخری حصہ میں آپ قیام لیل کی  برکت حاصل کر سکتے ہیں ۔ اس کا طریقہ بڑا آسان ہے۔ سحری کے لئے تو آپ اٹھتے ہی ہیں۔ پندرہ بیس منٹ پہلے اٹھ کر وضو کر کے دو رکعت نماز پڑھ لیں...................یہ رات کا وہ حصہ ہے جس کے بارے میں نبی کریم صلی اللہ علیہ وسلم نے بتایا ہے کہ الله تعالیٰ دنیا والوں کے بہت قریب آتا ہے اور پکارتا ہے۔ کون ہے جو مجھ سے مانگے کہ میں اسے جو مانگے وہ دوں، کون ہے جو مجھ سے اپنے گناہوں کی مغفرت چاہے کہ میں اس کو معاف کر دوں ۔ ایک روایت میں تو دل کو تڑپا دینے والے یہ الفاظ آتے ہیں کہ رات کو اس گھڑی میں اللہ تعالیٰ اپنا ہاتھ پھیلا دیتا ہے اور کہتا ہے۔ کون ہے جو ایسی ذات کو قرض دے جو فقیر ہے نہ ظالم اورصبح تک یہی کہتا رہتا ہے۔ جب الله تعالی ٰنے اپنی رحمت کا ہاتھ اس طرح پھیلا رکھا ہو اور آپ کھانے پینے کے لئے بستر سے اٹھ ہی رہے ہوں تو اس سے زیادہ آسان خوش نصیبی کی راہ اور کیا ہوسکتی ہے کہ آپ چند منٹ اور زیادہ لگا کر اپنے گناہ بخشوالیں اور جو مانگیں وہ پالیں۔

پانچویں چیز اللہ کی راہ میں فیاضی سے خرچ کرنا ہے۔ نماز کے بعد سب سے بڑی عبادت اللہ کی راہ میں خرچ کرنا ہے، جو کچھ الله تعالیٰ نے بخشا ہے وہ سب خرچ کرنا۔ وقت بھی اور جسم و جان کی قوتیں بھی۔ لیکن سب سے بڑھ کر مال خرچ کرنا۔ اس لئے کہ مال دنیا میں سب سے بڑھ کرمحبوب اور مرغوب ہوتا ہے اور دنیا کی محبت ہی ساری کمزوریوں کا سرچشمہ ہے۔

نبی کریم صلی الله علیہ وسلم سارے انسانوں سے زیادہ فیاض اورسخی تھے۔ لیکن جب رمضان المبارک آتا اور حضور کی ملاقات حضرت جبرئیل علیہ السلام سے ہوتی تو پھر آپ کی سخاوت اور دادو دہش کی کوئی انتہا نہ رہتی۔ آپ اپنی فیاضی میں بارش لانے والی ہوا کے مانند ہو جایا کرتے تھے۔ قیدیوں کو رہا فرماتے اور ہر مانگنے والے کو عطا کرتے ۔ پس آپ بھی رمضان میں اپنی مٹھی کھول دیں۔ اللہ کے دین کی اقامت وتبلیغ کے لئے ، اقرباء کے لئے ۔یتیموں اور مسکینوں کے لئے جتنا مال بھی اللہ کی راہ میں نکال سکیں نکالیں ۔ بھوک اور پیاس تو برداشت کرتے ہی ہیں کچھ تنگی اورسختی جیب کے معاملہ میں بھی برداشت کیجیے۔ لیکن جو کچھ دیجیےصرف اللہ کے لئے دیجیے۔ کسی سے بدلہ اور شکریہ کی خواہش آپ کے دل میں نہ ہو لا مزيد فكم جزا ًولا شکرا ً ہم تم سے نہ بدلا چا ہتے ہیں نہ شکریہ۔ اس سے کیا فائدہ کے آپ مال نکالیں ۔ سرمایہ کاری کریں اور اپنے ہی ہاتھوں سرمایہ اور نفع دونوں ضائع کر دیں۔ دعا ہے کہ الله تعالی ہم لوگوں کو اس سے محفوظ رکھے ۔ اور رمضان المبارک میں وہ تقوی ٰحاصل کرنے کی توفیق عطا فرمائے جس سے ہم قرآن مجید کی ہدایت کے مستحق ہوں ۔ ہم قرآن کا علم حاصل کریں ۔ اس پرعمل کریں۔ اللہ تعالی ہمیں قرآن کا پیغام لے کر کھڑا ہونے اور اس کو قائم کرنے کے لئے حوصلہ، عزم اور شوق ولولہ عطا فرمائے۔ آمین

وآخر و دعونا عن الحمد لله رب العالمين

مزید پڑھیں

Khushhaal Nama - Nazeer Akbarabadi

خوشحال نامہ

نظیر اکبر آبادی

جوفقر میں پورے ہیں وہ ہر حال میں خوش ہیں 

ہر کام میں ہر دام میں ہر جال میں خوش ہیں

 گرمال دیا یار نے  تو مال میں خوش ہیں

 بے زر جو کیا تو اسی احوال میں خوش ہیں

اجلاس میں اد بار میں اقبال میں خوش ہیں

پورے ہیں وہی مرد جو ہر حال میں خوش ہیں

 چہر ے پہ ملامت نہ جگر میں اثر غم 

ماتھے پہ کہیں چین  نہ ابرو میں کہیں خم

 شکوہ نہ زباں پر نہ کبھی چشم ہوئی نم

غم میں بھی وہی عیش الم میں بھی وہی دم

ہر بات ہر اوقات ہرا فعال میں خوش ہیں

پورے ہیں وہی مرد جو ہر حال میں خوش ہیں

گر اس نے دیاغم تواسی غم میں رہے خوش

اور اس نے جو ماتم د یا ماتم میں رہے خوش 

کھانے کو ملاکم تو اسی کم میں رہےخوش

جس طور کہا اس نے اس عالم میں رہے خوش

دکھ درد میں آفات میں جنجال میں خوش ہیں

پورے ہیں وہی مرد جو ہر حال میں خوش ہیں

جینے کانہ اندوه نہ مرنے کا ذرا غم

یکساں ہے انہیں زندگی اور موت کا عالم 

وا قف نہ برس سے نہ مہینے سے وہ اک دم 

نہ  شب کی مصیبت نہ کبھی روز کا ماتم

دن رات گھڑی پہر مہ و سال میں خوش ہیں

پورے ہیں وہی مرد جو ہر حال میں خوش ہیں

قشقے کا ہوا حُکم تو قشقہ وہیں کھینچا

جُبّےکی رضا دیکھی توجُبّہ و ہیں پہنا

آزاد کہا ہو تو و ہیں سر کو منڈایا 

جو رنگ کہا اس نے وہی رنگ  رنگا یا

کیا زرد میں کیا سبز میں کیا لال میں خوش ہیں

پورے ہیں وہی مرد جو ہر حال میں خوش ہیں

مزید پڑھیں

Ishq Phir Rang Woh Laya Hae Ke Ji Jane hae - Nazeer Akbarabadi

غزل

نظیر اکبر آبادی

عشق پھر رنگ وہ لایا ہے کہ جی جانے ہے 

دل کا یہ رنگ بنایا ہے کہ جی جانے ہے 

ناز اٹھانے میں جفائیں تو اٹھائیں لیکن 

لطف بھی ایسا اٹھایا ہے کہ جی جانے ہے 

زخم اس تیغ نگہ کا مرے دل نے ہنس کر 

اس مزے داری سے کھایا ہے کہ جی جانے ہے 

اس کی دزدیدہ نگہ نے مرے دل میں چھپ کر 

تیر اس ڈھب سے لگایا ہے کہ جی جانے ہے 

بام پر چڑھ کے تماشے کو ہمیں حسن اپنا 

اس تماشے سے دکھایا ہے کہ جی جانے ہے 

اس کی فرقت میں ہمیں چرخ ستم گار نے آہ 

یہ رلایا ،یہ رلایا ہے کہ جی جانے ہے 

حکم چپی کا ہوا شب تو سحر تک ہم نے 

رتجگا ایسا منایا ہے کہ جی جانے ہے 

تلوے سہلانے میں گو اونگھ کے جھک جھک تو پڑے 

پر مزا بھی وہ اڑایا ہے کہ جی جانے ہے 

رنج ملنے کے بہت دل نے سہے لیکن نظیرؔ 

یار بھی ایسا ملایا ہے کہ جی جانے ہے

مزید پڑھیں